Tingting blong ol Traboltaem
—Part 2, Gudfala Tingting
Ol pipol oli safa ol traboltaem samtaem, mo tingting long ol hadtaem ya i defren long wan wan long olgeta. Sam i gat gudfala tingting we i helpem olgeta se oli stap strong long ol trabol oltaem.
Long lesen ya, bambae yumi lukluk fofala tingting we i stret gud nomo.
1 Tingting we i No Foldaon From Trabol
I isi we yu kam taed tumas mo tingting blong yu i foldaon, be yu save leftemap tingting blong yu i go antap se, "Oltaem yumi mas luk long Jisas we hem nomo i stamba blong bilif blong yumi, i stat long stat blong hem gogo i kasem en blong hem." (Hibrus 12:1-3 BRB).
I gud yumi tingbaot Jisas mo ol safa blong hem, be hem i stap gogo i kasem viktori i winim olgeta. Nao yumi save leftemap tingting blong yumi stanap strong olwe, mo yumi no lego.
Evri man we i bin pas tru long ol hadtaem, i kam moa sua mo God i leftemap tingting blong hem olsem we Pol i talem se,
Rom 16:20, 8:37, 8:16-18
¶“20God i stamba blong pis blong yumi, mo bambae i no longtaem, hem i flatemgud Setan*, we bambae yufala i save purumbut long hem. Prea blong mi, we Jisas Masta blong yumi, hem bambae i stap givhan long yufala long gladhat blong hem (Romans 16:20). From we yumi joen long Kraes blong harem nogud olsem we hem i harem nogud, be bambae yumi save joen long hem bakegen, blong kasem gudfala laef blong hem long heven.... Long tingting blong mi, taem we yumi stap tingbaot gudfala laef ya blong heven we bambae i save kamtru long yumi, ol samting ya we naoia oli stap mekem yumi harem nogud tumas, oli olsem nating nomo” (Rom 8:16-18). Mi mi save finis we i no gat wan samting nating we i save tekemaot yumi long Kraes we hem i lavem yumi tumas (Rom 8:37).
2 Tingting we i Save Wet Longfala
Pol mo ol pipol we Pol i telemaot gudnuis blong Jisas long olgeta, oli kasem hadtaem. Long fiuja oli gat hop, long taem blong naoia oli gat trabol. Taswe Pol i teltelem olgeta se, "From we tingting blong yufala i stap strong long God, oltaem yufala i mas harem gud. Sipos yufala i gat trabol, yufala i mas mekem tingting blong yufala i longfala. Mo yufala i mas prea oltaem." (Rom 12:12)?
2Korin 6:4-6
¶“4Long olgeta samting we mifala i mekem, mifala i stap soemaot we mifala i man blong wok blong God. Mifala i gat trabol, mifala i gat hadtaem, mifala i stap harem nogud tumas, be tingting blong mifala i stap gud, i no foldaon. 5Long sam ples ol man oli wipim mifala, long sam ples oli putum mifala long kalabus, mo long sam ples oli raon long mifala blong ronem mifala. Mifala i hadwok we i bitim mak, we mifala i no gat taem blong slip mo kakae. 6Be long ol fasin blong mifala, mifala i stap soemaot we mifala i man blong wok blong God. Tingting blong mifala i klin, mo mifala i waes. Tingting blong mifala i longfala, mo oltaem mifala i gat sore long man. Tabu Spirit i stap long mifala, mo mifala i stap lavem ol man tumas, we fasin blong mifala i no blong giaman. ” (2Korin 6:4-6 BRB).
3 Tingting we i Stap Aninit God From Trabol
Nao long evri samting we yumi lukluk finis long lesen ya, i klia se yumi mas safa samtaem mo kasem soa long bodi o hat. Nao yumi mas stap aninit God we i stap trenem yumi. Pol i talem gudfala tok long tingting ya.
2Korin 4:16-18
¶“16Nao from samting ya, neva tingting blong mifala i kam nogud long ol trabol we i kasem mifala. Maet bodi blong mifala i stap kam nogud moa oltaem, be nating. Evri dei, God i stap mekem tingting blong mifala i niuwan bakegen. 17Ol trabol ya we i kasem mifala oli smol nomo, mo oli no save stap longtaem. Be frut blong olgeta i narafala olgeta, i gud tumas long mifala, mo i stap mekem mifala i rere blong go joen long gudfala laef ya blong God long heven, we i no save finis samtaem. 18Nao mifala i no moa tingbaot ol samting ya we yumi save luk long ae blong yumi. Mifala i stap tingbaot ol samting ya we yumi no save luk, from we ol samting ya we yumi save luk long ae blong yumi, oli blong stap smoltaem nomo. Be ol samting ya we yumi no save luk, oli blong stap oltaem, gogo i no save finis.” (2Korin 4:16-18 BRB).
4 Tingting we i Hapi From Trabol
Pita i talem se, "13 I stret blong yufala i harem gud, from we yufala i joen long Kraes, mo yufala i stap kasem haf blong ol samting ya we i mekem hem i harem nogud. Nao taem ol gudgudfala samting blong Kraes oli kamtru, bambae yufala i glad tumas." (1Pita 4:13 BRB).
Jisas i talem olsem, "11 Yufala we ol man oli stap spolem nem blong yufala, mo oli stap mekem i nogud long yufala, mo oli stap giaman, oli stap talem ol rabis tok agens long yufala from we yufala i man blong mi, yufala i save harem gud. 12 Yufala i mas harem gud yufala i glad, from we i gat bigfala pei blong yufala i stap long heven. Ol profet bifo, ol man oli mekem i nogud long olgeta long sem fasin ya nomo." (Matiu 5:11-12 BRB).
Tok ya, i no longsaed blong rabis tok nomo be i longsaed blong olgeta trabol we Setan i pusumdaon long yumi. "7Yes, God i soemaot plante gudfala samting long mi. Be blong blokem mi, blong tingting blong mi i no go antap tumas, hem i letem wan trabol i stap kam long mi oltaem. Trabol ya i olsem nil blong aranis, we i stap stikim mi, i olsem man blong karem tok blong Setan, we oltaem i stap kilim mi. Hemia i blong blokem mi, blong tingting blong mi i no go antap tumas." (2Korin 12:7).
Hemia sem tok blong trabol we Setan i pusum finis long Job, we yu rimemba se yumi bin luk befo.
Tingting blong wol i no save from wanem yumi hapi blong kasem trabol. Be yumi hapi tumas from yumi bilif se biaen trabol long wol ya, yumi kasem gudgudfala samting long laef long heven we i no save finis. Mo yumi bilif se trabol ya i gat gudfala tingting blong God biaen long hem (Romans 8:16-18).
Rom 8:16-18
¶“16Fasin blong samting ya, yufala i save finis. Sipos yufala i putum yufala i stap aninit long han blong wan man blong obei long hem, be yufala i man blong wok blong hem nao. Yufala i mas obei long hem oltaem. Be sipos fasin blong sin i bos blong yufala, bambae yufala i ded from. Be sipos fasin blong obei long God i bos blong yufala, God bambae i mekem yufala i stret man long fes blong hem. 17Be yumi stap talem tangkiu tumas long God, from we laef blong yufala i jenis. Bifo, yufala i olsem ol man blong wok we fasin blong sin i bos blong yufala. Be naoia, long olgeta tingting blong yufala, yufala i stap obei long ol trutok ya we oli tijim yufala long hem. 18God i mekem yufala i fri finis, fasin ya blong sin, hem i no moa bos blong yufala nao. Naoia, stret fasin i bos blong yufala, mo yufala i olsem ol man blong wok blong hem” (Rom 8:16-18 BRB).