Tingting blong ol Traboltaem
—Part 1, Tingting we i Nogud
Ol pipol oli safa ol traboltaem samtaem, mo tingting long ol hadtaem ya i defren long wan wan long olgeta. Sam i gat tingting we i no stret. Mi no min se tingting ya i sin, nogat. Be tingting ya i slak blong helpem olgeta stap strong long ol trabol blong olgeta, nao trabol i kam nogud moa.
Long lesen ya, bambae yumi lukluk fofala tingting we i stap nogud.
1 Tingting we i Gat Fraet From Trabol
Taem we yumi kasem trabol, yumi fraet from. Sapos yu luk bigfala trabol bambae i kam i smasem laef blong yumi, i givim yumi bigfala soa long speret o bodi, nao yumi fraet, be God i save tekemaot fraet ya..
Nevamaen, taem King Senakerib i bin tok nogud long King Hesekia, nao Hesekia i leftemap tingting blong ol soldia blong hem olsem, "Olgeta. !Tingting blong yufala i mas strong! !Yufala i mas stanap strong oltaem! Yufala i no mas fraet long king ya blong Asiria wetem ol soldia blong hem. Hem i gat paoa, be paoa blong hem i kam long man nomo. Be long saed blong yumi no olsem. Hae God i God blong yumi, mo hem nao i stap givhan long yumi. Paoa blong hem i bigwan moa winim paoa blong olgeta, mo hem bambae i faet long ol faet ya blong yumi" (2Kronikel 32:1-2,6-8 BRB).
Eni denja we i kam klosap long yumi, hemia nao Setan i stap mekem trabol long yumi. Be God i gat moa paoa blong mekem yumi stanap strong agensem Setan, olsem we Pol i tingtingbak long taem we i bin safa hadlaef, nao i talem ol Kristin man long Tesalonaeka, "Yufala i no letem trabol i mekem yufala i seksek nating" (1Tesalonaeka 3:2-4).
God i promis long yumi olgeta, olsem we i promis long Moses, "Hae God bambae i no save gowe long yu. Hem bambae i no save lego yu samtaem. Nao from samting ya, tingting blong yu bambae i no mas foldaon, mo yu yu no mas fraet. Hae God bambae i stap lidim yu, mo oltaem, hem bambae i stap wetem yu.”" (Dutronome 31:8 BRB).
2 Tingting we i Gat Sapraes From Trabol
Taem we yumi harem gud, mo laef blong yumi kasem ol gudfala samting, mo i go antap, yumi stap hapi tumas. Be sapos bigfala trabol i kam wantaem, yumi sapraes tumas from. Sam jos i tijim se bambae Jisas i tekemaot ol trabol, mo i blesem yumi we yumi harem gud long bodi blong yumi, olsem yumi kasem plante samting blong gudfala laef long wol ya, mo plante mani tu. Be tok ya i no stret.
Ol Kristin oli mas mekem tingting blong olgeta i stap rere blong bambae hadtaem i kam, mo oli no mas sapraes long hem o letem trabol ya i smasem tingting blong olgeta nating. Pita i talem se, "Ol fren. I nogud yufala i sapraes long ol strong samting ya we oli kam blong traem bilif blong yufala. Ol samting olsem, i no yufala nomo i kasem, be plante narafala Kristin man tu oli kasem. " (1Pita 4:12 BRB).
Jisas i talem stori finis long wan man i planem sid. Nao sam sid i foldaon long had graon we i gat ston long hem. Sid i gru lelebet be Jisas i talem se, "Sam man we oli kasem tok ya, oli olsem ples blong ston we sid i foldaon long hem. Hemia olgeta we oli harem tok ya, mo wantaem nomo oli glad long hem. Be tok ya i no go insaed gud long tingting blong olgeta, nao oli save stap smoltaem nomo. Mo sipos oli gat hadtaem, no ol man oli mekem i strong tumas long olgeta from tok ya, bambae oli foldaon wantaem. " (Mak 4:16-17 BRB).
Hadtaem ya, i stap tru yet long ol man tede we oli stap long kantri blong heven we God i stap lukaotem, mo Jisas Kraes i kam King blong ol man blong hem. Be olgeta ya, "oli gat hadtaem" samtaem. Jisas i talem se, "Man we i wantem kam biaen long mi, hem i mas blokem ol samting we hem nomo i wantem, nao i mas karem kros blong hem, i biaen long mi." (Matiu 16:24 BRB).
3 Tingting we i Gat Sem From Trabol
Samfala Kristin oli ting hae long ol samting long wol ya we i mekem, mo from samting ya, oli harem gud mo oli stap rij. Oli ting se ol gudfala samting ya i soemaout we oli waes mo oli mekem gudfala wok. Nao tingting ya maet i tru.
I no nid blong talem se i nogud we Kristin man i nogat hed, o i westem olgeta samting, o i kam yusles. I gud se i waes mo i lukaotem bodi blong hem, mo i usum long gudfala fasin evri gud samting we hem i gat.
Be nevamaen yumi mekem gudfala laef, yumi traehad, yet hadtaem bambae i save kam wantaem long samting we yumi nogat paoa blong blokem. Mo trabol ya maet i spolem olgeta gudfala wok we yumi bin mekem. Sapos hem i hapen olsem, maet yumi harem sem, mo ting se yumi stap mestem sam samting finis.
Be naoia, tok blong Jemes i soemaot we yumi no save kontrolem laef blong yumi oltaem, nao yumi no mas harem sem from.
Jemes 4:13-16
¶“13 Sam long yufala oli save talem se, 'Tede no tumora bambae mifala i go long wan narafala taon. Nao long ples ya, bambae mifala i stap wan fulyia, bambae mifala i mekem wok blong kasem plante mane.' Yufala i lesin long mi. 14 Yufala i no save nating wanem bambae i save kamtru long laef blong yufala tumora. Yufala i olsem smok blong hil nomo. Smok ya i save kamtru we i stap smoltaem nomo, nao biaen i lus bakegen. 15I stret blong yufala i talem se, “Sipos Hae God i wantem, bambae mifala i stap laef, nao bambae mifala i save mekem olsem, no olsem.” 16Be taem yufala i stap tok flas olsem, tingting blong yufala i go antap tumas. Mo ol tok flas olsem i nogud.” (Jemes 4:13-16 BRB).
So yumi no mas harem sem from we yumi safa hadtaem mo trabol. Be sapos yumi ting se yumi no save kasem trabol, yumi sud filim sem from yumi stap praod nomo long tingting ya.
Pita i talem se, "Be sipos yufala i stap safa from we yufala i man blong Kraes, hemia i no samting blong sem. Yufala i mas presem God from we nem blong Kraes i stap long yufala olsem." (1Pita 4:16).
Disfala tok i longsaed blong olgeta kaen safa we eni Kristin man maet i kasem blong karem. I olsem safa blong Job (Jemes 5:10-11).
Bigfala safa blong Job, i no kam from fol blong Job —nogat be Setan i kasem blem from i wantem mekem trabol blong smasem bilif blong Job. Nao God i letem Setan from God i trastem Job se hem i no lusum bilif blong hem nogat, mo hem i kasem viktori (Job 1-2).
Hemia nao, yumi andastandem trabol ya we i no fol blong yumi, nao yumi no filim sem long hem
4 Tingting we i Stikim Hat From Trabol
Long taem we trabol i kam, tingting blong yumi go daon, mo hat blong yumi soa. Yumi harem fraet, konfius, mo sore. Yumi tingting hevi. Be i nogud moa, from tingting blong yumi stikim yumi mo i jagem yumi. Nao samting ya i hevi tumas blong karem long hat blong yumi.
Sam Kristin man oli ting se taem we oli safa sam trabol samtaem, God i panisim olgeta from sam sin we oli bin mekem. Be God i no panisim yumi nogat. God i stap forgivim yumi. "Be naoia, i no gat wan man nating we i save jajem yumi se bambae yumi mas kasem panis, from we yumi stap joen long Jisas Kraes... Nao gudfala fasin ya blong Tabu Spirit i mekem mi mi fri finis, i brekem paoa blong rabis fasin ya we i stap pulum mi blong mi mekem sin gogo" (Rom 8:1-2). Yes i brekem paoa finis, nao mi mi fri.
Be God i save stretem yumi taem we i letem hadtaem i kam long yumi. God i talem long yumi se, "5 Ating yufala i fogetem finis tok ya blong leftemap tingting blong yufala, we i stap long Baebol. Long tok ya, God i toktok long yufala, olsem we yufala i stret pikinini blong hem, i talem se, 'Pikinini blong mi, mi mi Hae God. Sipos mi mi mekem wan samting long yu blong stretem yu, yu yu mas rere blong lan. Sipos mi tok strong long yu, bambae yu no harem nogud, we tingting blong yu i foldaon. 6 Mi mi Hae God, mo mi save stretem olgeta ya we mi lavem olgeta, mo mi save wipim olgeta ya we mi stap singaot olgeta se oli pikinini blong mi.'" (Hibrus 12:5-6 BRB).
Baebol long pasis ya, i no tokbaot panis long helfaea. Mo i no tokbaot trabol we God i givimbak long yumi from yumi bin givim trabol long hem fastaem, nogat. Naoia i tokbaot trabol we Setan i mekem long yumi, mo God i letem blong traem bilif blong yumi nao i mekem bilif ya i kam strong moa.
Leta long Hibrus, i givim yumi wan pija blong samting we i olsem fasin blong ol Kristin man blong safa trabol. "Mo oltaem yumi mas luk long Jisas we hem nomo i stamba blong bilif blong yumi, [nao bilif ya i olsem wan resis we yumi save ron] i stat long stat blong hem gogo i kasem en blong hem." (Hibrus 12:1).
Eni man we i wantem ron long resis, hem i mas mekem trening. Nao man ya i soa from eksasaes ya. "...sipos han blong yufala i slak, yufala i mas leftemap i go antap. Mo sipos ni blong yufala i stap seksek, yufala i mas mekem i kam strong bakegen..." (Hibrus 12:12 BRB). Sapos eksasaes blong trening i mekem yu soa, nao yu no stap nating, be yu gohed gogo yu kam strong.
Yu mas kam soa mekem se yu kam strong moa. I olsem we God i letem yu yu safa blong trening long fasin blong Jisas Kraes, blong mekem yu moa strong long bilif blong yu.
God i ting se yu yu nidim samting ya. Be God i no wantem panisem yu nogat. God i lavem yu mo i wantem se yu kam strong moa. Be i no wantem putum eni sem long yu. "Nao from samting ya, taem mi mi stap long trabol from we mi man blong Kraes, be tingting blong mi i save stap kwaet. Taem mi no gat paoa, no ol man oli tok nogud long mi, no mi gat hadtaem, no ol man oli mekem i nogud long mi, no mi harem we laef i strong tumas, be mi mi glad nomo, from we long taem we mi mi no gat paoa, long taem ya nao, mi mi gat paoa." (2Korin 12:9-10 BRB).