God i Stamba Blong Pis
—Filipae 4:1-9
Disfala wol i no gat pis, i gat tumas trabol mo wari long hem olbaot. Long Baebol Filipae 4:1-9, i talem se God i stamba blong pis mo i soemaot hao nao yumi save kasem pis mo hapi tingting.
Filipae 4:1-9
1 Ol brata mo sista. Mi mi lavem yufala tumas, mo mi wantem tumas blong luk yufala. Yufala i stap mekem mi mi harem gud, mo mi glad tumas long yufala. Mi mi lavem yufala tumas. Nao from samting ya, yufala i mas stanap strong long paoa blong Masta blong yumi from we yufala i joen finis long hem. 2 Yuodia mo Sintike. Mi mi talem strong long yutufala, se from we yutufala i woman we i joen long Masta blong yumi, yutufala i mas gat wan tingting nomo (Filipae 4:1-2).
3 Yes, mo yu tu we yumitufala i bin wok tugeta longtaem finis, mi wantem blong yu yu givhan long tufala woman ya. Tufala ya i wok strong wetem mi, mo Klemen, mo ol narafala man ya we oli wok wetem mi long ol wok blong gud nius blong Kraes. Nem blong olgeta ya i stap finis long buk ya blong God, we nem blong olgeta we oli gat laef, i stap long hem. 4 Yufala we i joen long Masta blong yumi, oltaem yufala i mas glad. Mi mi talem bakegen, se yufala i mas glad.(Filipae 4:3-4).
5 Yufala i mas soemaot long olgeta man, we yufala i kwaet man. Bambae i no longtaem Masta blong yumi i kamtru. 6 Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. 7 Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes. (Filipae 4:5-7).
8 Ol brata mo sista. Mi wantem talem wan samting moa long yufala. I gat ol gudfala fasin i stap we oli stret gud, mo we i stret nomo blong yumi presem ol man we oli mekem ol fasin ya. Mo yufala i mas putum tingting blong yufala i stap strong long ol fasin olsem. Ol fasin ya oli tru, mo oli hae, mo oli stret, mo oli klin gud, mo oli save mekem yumi harem gud, mo ol man oli stap ona long olgeta we oli stap mekem ol fasin ya.(Filipae 4:8).
9 Yufala i mas holem ol fasin ya we mi mi soemaot long yufala long ol tok mo ol wok blong mi, mo we mi tijim yufala long hem, nao yufala i lanem olgeta finis. Nao God ya we i stamba blong pis, hem bambae i stap kampani wetem yufala (Filipae 4:9).
Bislama Revised Bible © Bible Society of the South Pacific, 2012.
1 Yumi stap kampani wan wan
Pol i lavem tumas ol brata mo sista long Filipae, we oli bilif long Jisas Kraes. Oli stanap strong wetem Pol. Fasin blong olgeta i wan bilif nomo nao oli kampani togeta. From samting ya, i nogat eni samting nating we i save divaedem olgeta from oli holem taet wan bilif nomo we i joenem olgeta. Nao bilif mo trutok ya, i bitim any smol tingting we oli no agri.
Pis i stap from ol nem blong ol man ya oli stap finis long buk ya blong God, we ol nem blong olgeta we oli gat laef, oli stap long hem (Filipae 4:3).
So ol Kristin man, oli mas gat wan tingting nomo (Filipae 4:2) mo oltaem oli mas glad. (Filipae 4:4). Tingting ya, i kamaot long God mekem se ol Kristin man i save stanap strong agensem ol enemi blong Kraes.
2 Yumi no mas wari
Sipos yumi trabol from sam samting nogud, i gud se yumi no stap tingting tumas, i gud yumi prea long God from evri samting (Filipae 4:6). Ol man we oli wari oltaem bambae oli kam angri, nao oli faerap mo faet. Sipos pipol lukum samting ya, bilif blong olgeta i lus from.
Naoia Kristin man i mas soemaot long olgeta man we hem i kwaet man (Filipae 4:5). God i save leftemap tingting blong ol Kristin man, mo God i stap givim plante samting we i gud blong tingbaot. From samting ya, yumi mas prea oltaem longsaed blong evri problem mo talem tankiu long God. Nao God i stap oltaem from yumi, mo yumi kasem pis blong Hae God (Filipae 4:6-7).
3 Tingting blong yumi i no mas stap konfius
Yumi mas putum tingting blong yumi i stap strong long ol fasin ya we oli tru, mo oli hae, mo oli stret, mo oli klin gud nomo (Filipae 4:8).
Tingting blong yumi i no mas go raon olbaot olsem bataflae. Wing blong hem i kalakala mo i luk naes be i no flae stret. Tingting blong yumi i mas folem stret long rod we God i mekem finis. From God i gat paoa we i bitim eni paoa long disfala wol.
Tingting ya, i helpem yumi stanap strong long fasin no fraet. Mo i helpem yumi harem gud mo stap hapi oltaem yumi wokbaot wetem God long rod blong laef ya.
4 Yumi mas praktis trutok blong Kraes
Ol Kristin man blong Filipae, oli bin KASEM Trutok blong Kraes. Pol i bin TIJIM olgeta. Mo Pol i bin SOEMAOT trutok ya blong eksampol blong hem. Nao jos blong Filipae oli LANEM long revelesen blong Pol. Mo oli HOLEM trutok ya (Filipae 4:9).
Ol Kristin man oli mas praktis trutok blong Kraes blong bambae oli kam strong moa blong pastru long disfala laef. Naoia wok mo bilif tufala i stap togeta.
Long laet blong lesen ya, nao yumi stap kwaet mo strong. Yumi kasem tingting we i bildimap yumi long Kraes, mo yumi mekem gudfala wok wetem bilif. Hemia rod blong yumi blong yumi harem gud, stap glad, mo kasem salvesen mo pis blong God.