Profet, Pris, mo King
—Hemia Jisas Kraes
Jisas Kraes i stap haeman wetem haenem long trifala defren fasin ya. Nambawan i fasin blong profet. Nambatu i fasin blong pris. Nambatri i fasin blong king. Nao yumi tingbaot trifala samting ya.
1 Profet
Nao ol profet long Baebol oli gat spesel work se God samtaem i givim tru tok long profet mekem se hem i mas talemaot tru tok ya long sam pipol. Eni taem we wan profet i spik from God, nao pipol oli mas lisengud long hem, from tok blong profet ya i olsem tok blong God.
Jisas Kraes hem nao i namba wan profet se i karem haenem i antap olgeta, mo ol naranarafala profet oli bin tokbaot hem.
"Bifo, long ol yia we i pas finis, plante taem, God i stap yusum ol profet blong toktok long ol olfala blong yumi long plante naranarafala fasin. Be naoia we i klosap taem we wol ya bambae i finis, hem i yusum Pikinini blong hem blong toktok long yumi" (Hibrus 1:1 BBR).
Baebol i tokbaot Jisas we hem i wan profet olsem Moses, be Jisas i profet we i hae moa.
Wan Profet we i Olsem Moses
Steven i talem se... "Moses ya we i talem long ol laen blong Isrel se, 'God bambae i putumap wan profet blong yufala, olsem we i putumap mi.' Profet ya bambae i wan long yufala." (Wok 7:37).
Moses i talem se... "Bambae God i putumap wan profet blong yufala olsem mi, we man ya bambae i kamaot long yumi nomo mo bambae yufala i mas obei long hem." (Dutronomi 18:15 ).
Hao nao Jisas i profet we i olsem Moses? God bifo i bin givim Moses wan loa mo promes nem blong hem kavenan. Nao Moses i karem loa ya i kam long ol pipol blong God we Moses i hedman long olgeta, i profet mo pris. Be Jisas, hem tu i profet mo pris, be i gat wan niufala loa mo promes we i gud moa. Kavenan ya i beswan.
"Be naoia yumi luk we wok blong pris we Jisas i stap mekem, hem i moa gud, i winim ol wok ya we ol pris ya bifo oli stap mekem. Mo long sem fasin, promes we God i wantem mekem wetem yumi, we Jisas i tekem i kamtru, hem tu i moa gud, i winim promes ya blong bifo, from we ol tok blong mekem i stanap i moa gud..." (Hibrus 8:6 BBR).
2 Pris
Nao ol pris long Baebol oli gat spesel work se God samtaem i givim raet blong mekem sakrefaes from ol sin we pipol blong hem oli mekem. Eni taem we wan pris i mekem sakrefaes olsem, nao God i soemaot gladhat blong hem long man blong sin.
Evri dei, ol pris blong ol laen blong Isrel oli stap mekemol wok blong olgeta, we plante taem oli stap mekem sem fasin blong mekem sakrefaes blong tekemaot sin blong ol man. Be fasin ya bambae i no save tekemaot sin blong man samtaem (Hibrus 10:11 BBR).
Be Kraes i letem laef blong hem blong i tekemaot sin blong ol man. Mo fasin ya we hem i mekem, we hem i ded wan taem nomo, hemia i naf blong tekemaot sin blong ol man, gogo i no save finis. Nao biaen, hem i go sidaon long raet saed blong God (Hibrus 10:12 BBR).
Mo [Jisas] i stap wet long ples ya, gogo God bambae i mekem ol enemi blong hem oli stap aninit long paoa blong hem, oli slef blong hem, olsem we Baebol i talem. Long wan sakrefaes ya nomo we Kraes i mekem, hem i mekem ol man oli tabu, oli man blong hem, we olgeta oli stret gud olgeta, nao bambae oli stap olsem gogo i no save finis (Hisbrus 10:13-14 BBR).
Baebol i tokbaot Jisas we hem i wan pris olsem Melkisedek, be Jisas i hae pris we i hae moa long ol narafala pris.
Wan Pris we i olsem Melkisedek
"Jisas i go insaed long [tabu] ples ya finis long bihaf blong yumi, blong openem rod blong yumi. Hem i kam Hae Pris finis, olsem pris ya Melkisedek bifo, mo bambae hem i holem wok ya oltaem gogo i no save finis" (Hibrus 6:20 ).
"Yu yu pris olsem pris ya Melkisedek bifo, mo bambae yu holem wok blong pris oltaem, gogo i no save finis" (Hibrus 7:17).
Hao nao Jisas i pris we i olsem Melkisedek? God bifo i bin givim Melchizedek paoa blong pris mo king. Be Jisas, hem tu i pris mo king, be paoa blong hem i stap ova olgeta wol, mo paoa ya i no save finis.
3 King
Nao ol king long Baebol oli gat spesel work se God samtaem i givim paoa long king blong lukaotem nesen blong hem mo mekem sua se oli obei tok blong God. Eni taem we king i spik from God, nao pipol oli mas lisengud long hem, from tok blong king ya, mo ol stret rul we hem i mekem, i olsem tok blong God.
Baebol i tokbaot Jisas we hem i wan king olsem David, be Jisas i king we i hae moa.
Wan King we i Olsem David
"Taem we hem i stap rul, oltaem paoa blong hem bambae i stap kam bigwan moa, mo ples we hem bambae i rul long hem, oltaem bambae i stap kwaet. Bambae hem i wan man we i kamaot biaen long King Deved, mo bambae hem i rul long ples blong king ya. Paoa blong hem bambae i stanap long ol fasin blong hem we i stret olgeta, mo long stret fasin blong hem blong jajem man, mo bambae hem i stap rul oltaem nomo, i stat naoia, gogo i no save finis. Hae God. Yu yu gat olgeta paoa, mo yu yu mekem tingting blong yu i strong finis, blong mekem olgeta samting ya i kamtru." (Aesea 9:7)
"Hem i wan profet, mo hem i save we God i mekem wan strong promes long hem, we bambae wan man we bambae i kamaot biaen long hem i mas kam king bakegen, olsem hem" (Wok 2:30).
Hao nao Jisas i king we i olsem David? God bifo i bin givim David paoa blong king mo profet long Israel, Hem i wan spesel nesen i kamaot long laen blong Jacob. Be Jisas, hem tu i king mo profet, be paoa blong Jisas i sem mak blong God. Nao paoa blong hem i no save finis. Mo nesen blong hem i kamaot long evri nesen long wol ya