Trifala kaen man nogud i stap
— we i mekem sin
Baebol i no letem fasin nogud i stap. Baebol i strong long stretem man nogud. Man we i tijim long Baebol, i no mas stap tok sofsof tumas agensem man nogud. Be ol man we oli mekem sin, oli no sem mak olgeta. Yumi mas skelem olgeta man ya, blong dil long defren fasin wetem wan wan long olgeta. Long lesen ya, bambae yumi lukluk long trifala kaen man we i mekem sin, mo defren fasin we tingting blong God i stap long wan wan blong trifala ya.
Stori we Jisas i bin talem (Luk 18:9-14).
"Man ya blong tekem mane blong takis, hem i stap stanap longwe, mo i no save luk antap long heven. Hem i harem nogud, i stap kilim jes blong hem from, nao i stap talem se, 'God, mi mi man nogud. Plis, yu sore long mi'." Nao God i harem pre blong man nogud ya (Luke 18:13). Be hao nao God i save harem hem? From "Yumi save we God i no save lesin long man blong mekem sin." (Jon 9:31).
Hemia nao, i klia se defren kaen man nogud oli stap, mo tingting blong sam i defren long tingting blong narafala. Man ya blong tekem takis, hem i harem nogud long hat blong hem, i sori tumas blong sin we i bin mekem, i tanem tingting blong hem mo i kam blong askem se God bambae i sore long hem.
God i save fogivim ol man nogud we oli olsem man ya. Be wan narafala man, Farisi ya, hem tu i man nogud, be tingting blong hem i antap mo hem i ting se i gud moa long narafala. Nao God i no harem pre blong hem (Luk 18:9-14).
Long lesen ya, nao yumi lukluk long trifala kaen man we i mekem sin, mo defren fasin we tingting blong God i stap long wan wan blong trifala ya.
1 Man nogud we hat blong hem i had
Fas kaen man nogud, hem i man we i lavlavem sin mo oltaem i wantem mekem sin. Tingting blong hem i stap agensem God oltaem. Man ya, i neva jenisem tingting blong hem. Yumi no mas trastem ol man olsem man ya. Yumi mas stewe long olgeta.
- Efesas 4:17-19 "18 Tingting blong olgeta ya i stap long tudak nomo. Nao oli stap longwe tumas long laef ya we God i stap givim, from we tingting blong olgeta i kam strong olsem ston nomo, nao oli no gat save.
19 Oli no moa gat sem nating, nao oli stap gohed olbaot, oli stap ronem woman, mo oli stap mekem ol fasin we i rabis olgeta, we i no gat wan samting blong blokem olgeta" (Efesas 4:17-19). - Hibrus 6:4-6 "4 Be olgeta ya we oli gobak finis, i no gat rod blong oli tanem tingting blong olgeta blong kambak bakegen. Olgeta oli kam finis long laet blong God. Oli kasem finis gudfala presen ya we i God i givim, mo Tabu Spirit i kam finis long olgeta, wetem ol narafala man.
5 Oli faenemaot finis we tok blong God i gud tumas, mo oli harem finis paoa blong niufala wol ya we bambae i kamtru i no longtaem.
6 Be biaen, oli livim fasin blong bilif, oli gobak. Naoia i no moa gat rod nating blong mekem olgeta oli tanem tingting blong olgeta bakegen from sin blong olgeta, from we i olsem we oli stap nilim Pikinini blong God long kros bakegen, oli stap mekem sem long hem long fes blong olgeta man." (Hibrus 6:4-6). - 1Timoti 4:2 "2 Fasin ya bambae i kamtru from ol giaman toktok blong ol man we oli gat tu tingting, we Setan i bonem mak blong hem finis long tingting blong olgeta, nao oli no moa save haremsave trutok. " (1Timoti 4:2).
- Luk 7:30 "30 Be ol Farisi mo ol tija blong Loa oli no go long Jon blong hem i baptaesem olgeta. Long fasin ya, olgeta oli sakemaot plan ya we God i mekemrere se i blong olgeta." (Luk 7:30).
- 2Pita 2:20-22 "...22 Fasin blong man olsem i soemaot we tu olfala tok ya i tru we wan i talem se, 'Dog i save gobak blong kakae traot blong hem bakegen,' mo narawan i talem se, 'Taem pig i swim gud finis, be biaen, bambae hem i save go slip bakegen long sofmad.'" (2Pita 2:20-22).
2 Man nogud we hem i stap drif
Seken kaen man nogud hem i no min se hem i mekem sin, be tu, hem i no stretem tingting blong obei long toktok blong God. Spirit blong hem i stap slip nomo, i stap drif nomo be i no save wea. Yumi mas wekemap mo wanem ol man nogud we oli stap olsem seken kaen man ya. Yumi mas trae blong stopem drif blong lus.
- Rom 13:11 "11 ...Yufala i savegud taem ya we yumi stap long hem naoia. Hem i taem blong yufala i wekap, yufala i no moa slip. Fastaem, taem we yumi jes bilif long Kraes, taem ya we bambae hem i sevem yumi stap longwe lelebet long yumi. Be naoia, taem ya i stap kam klosap moa." (Rom 13:11).
- Efesas 5:14 "...Yu we yu stap slip, yu wekap, yu girap long ded, yu laef. Nao Kraes bambae i givim laet long yu" (Efesas 5:14).
- 1Korin 11:30 "30 i gat plante long yufala we oli stap sik mo [oli no strong], mo i gat sam long yufala we oli [slip]..." (1Korin 11:30).
- Matiu 7:13-14 "13 Mo Jisas i talem se, Yufala i mas pas long get ya we i smol nomo blong go insaed. From we get ya we i bigwan, mo rod ya we i isi nomo, hemia i blong go lus. Mo plante man oli stap folem rod ya. 14 Be get ya we i smol nomo, mo rod we i strong, hemia i blong go kasem laef. Mo smol man nomo oli faenem." (Matiu 7:13-14).
- Wok 24:25 "24 ...Taem Pol i stap tokbaot fasin blong bilif long Jisas Kraes, Filiks i stap lesin long hem. 25 Be taem Pol i stap tokbaot ol gudfala fasin, mo fasin ya se man i mas blokem ol samting we hem nomo i wantem, mo dei ya we God bambae i jajem olgeta man, Filiks i seksek gud. Nao hem i talem se, 'I naf fastaem, yu save goaot. Taem mi mi gat janis, bambae mi singaot yu bakegen'" (Wok 24:25).
- Jud 1:22-23"22I gat sam man we bilif blong olgeta i no strong, oli gat tu tingting, mo yufala i mas sore long olgeta. 23Mo i gat sam narafala man we klosap oli lus, we yufala i mas sevem olgeta, olsem we yufala i pulumaot olgeta long faea. Mo i gat sam narafala man tu we yufala i mas sore long olgeta, be yufala i mas fraet long olgeta tu. Nating we klos blong olgeta nomo, be yufala i mas fraet long hem, yufala i no mas tajem, from we ol rabis fasin blong olgeta i mekem klos blong olgeta tu i doti." (Jud 1:22-23).
3 Man nogud we hem i stap traehad blong folem gud fasin
Man we i no olsem fas kaen o seken kaen blong man nogud, nao hem i namba tri kaen. Hem i olsem man blong tekem takis long stori we Jisas i talem finis.
Namba tri kaen man nogud, hem i wantem obei long tok blong God. Man ya, hem i wantem laef blong hem bambae i stret gud nomo. Hem i traehad blong blokem ol sin blong hem. Kraes i stap givhan long hem i sofsof long hem mo i sore long hem.
Mo ol man we i sem mak long nambatri kaen man nogud, oli save helpem wan wan narafala man we i sem mak long olgeta, mekem se ol nambatri kaen man nogud oli stap joen tugeta blong winim Setan.
- Hibrus 10:21-22 "21 Jisas i nambawan Hae Pris* blong yumi, we i stap lukaot long ol man blong God. 22 Mo from samting ya, i gud yumi kam klosap long God, we tingting blong yumi klin, mo bilif blong yumi strong, mo tingting blong yumi we fastaem i doti from ol sin blong yumi, i kam klin long blad blong Kraes*, mo bodi blong yumi tu i klin, from we yumi swim finis long wota ya we i klin." (Hibrus 10:21-22).
- Hibrus 4:14-16 "14 Yumi mas holemtaet fasin ya blong bilif we yumi talemaot finis se hem i bilif blong yumi. I tru, yumi gat wan nambawan Hae Pris blong yumi, Jisas ya, Pikinini blong God, we hem i go insaed long heven finis, stret long fes blong God.
15 Hae Pris ya blong yumi, hem i savegud we yumi no gat paoa, nao hem i gat sore long yumi, from we olgeta samting blong traem yumi oli traem hem finis. Be wan samting nomo, hem i no mekem sin.
16 Nao from samting ya, i gud yumi mekem tingting blong yumi strong, nao yumi kam long fes blong God we hem i stap givhan long yumi long gladhat blong hem. Nao hem bambae i sore long yumi, mo long gladhat blong hem, hem bambae i givhan long yumi, stret long taem we yumi trabol" (Hibrus 4:14-16). - Rom 8:11 Struggle and victory: "1 Be naoia, i no gat wan man nating we i save jajem yumi ya we yumi stap joen long Jisas Kraes, se bambae yumi mas kasem panis" (Rom 8:11).
- Wok 8:22 Pita i talem long Saemon, man blong majik mo kleva: "22 Yu mas tanem tingting blong yu from rabis plan ya blong yu. Mo yu mas prea long Hae God* blong hem i fogivim yu, from samting ya we yu tingbaot blong mekem" (Wok 8:22, cf 1Jon 1:5-10).
Yu Save Stanap Strong (Efesas 6:10-18).
10 Lastok blong mi i olsem. Yufala i mas joen long Masta* blong yumi, blong kasem paoa. Hem i gat olgeta paoa, mo yufala i mas kam strong long paoa blong hem.
11 Yufala i mas kasem paoa blong God, we i olsem olgeta samting blong faet we i blong blokem ara. Nao taem Setan* i stap wokem ol giaman trik blong hem, be bambae yufala i save stanap strong.
12 Olgeta ya we yumi stap faet agens long olgeta long laef blong yumi, oli no man. Yumi stap faet agens long ol devel we oli stap olbaot long wol ya. Hemia ol lida blong olgeta, mo olgeta we oli gat paoa, mo ol jif blong olgeta we oli stamba blong ol fasin blong tudak long wol ya.
13 Nao from samting ya, yufala i mas kasem paoa blong God we i olsem olgeta samting blong faet. Nao taem dei blong faet long Setan i kam, be bambae yufala i save stanap strong. Long fasin ya, bambae yufala i save faet long ol enemi gogo kasem en blong hem, nao biaen, bambae yufala i save stanap strong yet.
14 Yufala i mas stanap rere blong faet. Oltaem yufala i mas talem trutok. Fasin ya i olsem strap we yufala i taetem finis long bel blong yufala. Mo yufala i mas holem stret fasin. Hemia i olsem klos blong faet we oli wokem long aean, blong ara i no save kasem yufala.
[I gat moa tok long vas 15 go kasem vas 18.]
Bislama Revised Bible © Bible Society of the South Pacific, 2012.