Nambawan Kwestin We Yumi Mas Askem
—?Wanem mi mas mekem blong God i sevem mi?
I gat wan kwestin we i impoten moa long evri narafala kwestin i stap. Kwestin ya i bitim evri kwestin we yumi save askem blong olgeta samting long wol ya. Kwestin ya, we i antap, i olsem se, “Wanem mi mas mekem blong God i sevem mi?” Yumi mas save askem wanem God i wantem se yumi mas mekem. Ansa long kwestin ya, i mas kam long trutok blong God long Baebol. Ansa ya i no mas kam long tingting blong yumi nomo.
1 Bigbigfala Kwestin
Kwestin ya se, “Wanem mi mas mekem blong God i sevem mi?” hem i bigfala kwestin ya, i big moa, i antap long olgeta narafala kwestin we man i save askem.
Long baebol, long buk blong Luk, i gat tufala stori longsaed blong kwestin we tufala man i bin askem Jisas se, "Tija, wanem mi mas mekem blong kasem laef we i no save finis?" (Luk 10:25,18:18). Faswan man ya, i wantem sem ansa we evri tija i stap givim, be seken man i wantem narafala ansa we i gud moa. Be tufala man ya, i askem kwestin we i nambawan kwestin we i stap long wol.
Long dei blong Pentekos we i kam afta Kraes i go antap long heven finis, nao Pita i talemaot trut blong Kraes long plante man long Jerusalem. "Taem ol man oli harem tok ya, oli harem we i stikimgud olgeta. Nao oli askem long Pita mo ol narafala aposol se, 'Ol brata. ?Bambae mifala i mekem olsem wanem?'" (Wok 2:37).
Taem we Sol blong Tasas i bin go long rod long Damaskas i luk Jisas long bigfala laet i saendaon. Sol i askem kwestin se, "Masta, yu yu hu ya?" Jisas i ansarem Sol olsem se, "Mi Jisas, man Nasaret ya we yu yu stap mekem i nogud long mi". Sol i askem se, "Masta, bambae mi mekem olsem wanem?" (Wok 22:6-10).
Long Filipae, bos blong kalabus i fraet from bigfala etkwek i seksekem kalabus mo ol doa blong kalabus oli kam open. Nao Pol mo Silas tufala i stap long kalabus ya. Nao bos blong kalabus i askem tufala se,"E, tufala! Bambae mi mi mekem olsem wanem blong God i sevem mi?" (Wok 16:30).
Kwestin ya, i soemaot we yumi nomo i no save wokem eni samting blong sevem yumi, sapos i kamaot long tingting blong yumi nomo. Naoia yumi mas harem wanem God i talem long Baebol, se yumi mas mekem blong sevem yumi. Hemia nao, yumi mas faenemaot wanem God i wantem se yumi mas mekem. Yumi mas askem bigfala kwestin.
2 Bigbigfala Storian
Ansa long nambawan kwestin i stap kamaot long trutok long storian blong Jisas Kraes, nao storian ya i stap long Baebol. Nem blong hem “gospel” mo mining blong nem ya, “gudnius” blong Jisas Kraes.
Long plante taem bifo, God i usum ol profet blong talem storian blong Kraes se bambae hem i kam blong soemaout we stori ya i tru we i tru. Baebol i talem se, "Bifo, long ol yia we i pas finis, plante taem, God i stap yusum ol profet blong toktok long ol olfala blong yumi long plante naranarafala fasin. Be naoia we i klosap taem we wol ya bambae i finis, hem i yusum Pikinini blong hem blong toktok long yumi." (Hibrus 1:1-2).
Jisas i bin jusumaot ol aposol mekem se oli talemaout storian blong hem long olgeta wol. Nao yumi save ridim stori ya we ol aposol oli raetemdaon finis long Niutestamen long Baebol.
Wan nem blong Jisas i olsem “Tok”, nao God i usum Tok ya blong mekem evri samting we i stap long wol ya. Tok ya (Jisas) hem i bin stap wetem God bifo bifo, mo hem tu i God olsem Papa blong hem (Jon 1:1-4).
Tok ya i kam man, nao i stap wetem yumi, mo hem i stap soemaot we God i lavem yumi tumas, mo i stap mekem i gud tumas long yumi, mo i soemaot tu we God i tru olgeta. Mo mifala i luk bigfala paoa blong hem. Hemia bigfala paoa ya we God we i Papa blong hem i givim long hem, from we hem nomo i stret Pikinini blong God.""(Jon 1:14). Stamba tingting blong Tok ya (Jisas) i wanem? "Olgeta! Man ya, hem i smol sipsip blong God, we hem bambae [i sakrefaes] i tekemaot sin blong olgeta man long wol." (Jon 1:29-30).
Taem we Jisas i stap long wol ya finis, laef blong hem i nogat sin long hem nating. So i save givim laef blong hem finis we i wan sakrefaes. "...Kraes i givim laef blong hem wan taem nomo, [blong mekem sakrefaes] blong tekemaot ol sin blong plante man..." (Hibrus 9:26-28).
3 Bigbigfala Plan
Olgeta samting ya, i blong stamba tingting blong God bifo hem i bin mekem wol ya. "Bifo olgeta, taem God i no mekem wol yet, hem i jusumaot Kraes blong wokem samting ya. Mo naoia we i no longtaem bambae wol i finis, God i soemaot hem finis blong sevem yufala." (1Pita 1:20).
Ded blong Kraes, hem tu i bin stap olwe long plan blong God. "Taem God i putum man ya long han blong yufala, hem i mekem samting ya folem plan blong hem nomo. Mo yufala i kilim hem i ded, long fasin ya we yufala i putum hem long han blong ol man nogud, we oli nilim hem long kros." (Wok 2:23).
God i mekem ol plan bifo hem i mekem eni samting long wol. Be bigfala plan ya hem i plan blong God i sevem yumi samtaem. I nogat plan we i impoten moa from plan ya i rod blong sevem olgeta man mekem se bambae oli no mas kasem panis from sin blong olgeta. Tok ya i stap longsaed blong ples we bambae man is stap long taem we i nogat en long hem. God i mekem plan finis nao olgeta man i save kasem rod long laef wetem God we i no save finis (Jon 3:16).
Maet yu kasem wan bebet long garen blong yu. Nao yu lukluk long bebet ya. Maet bebet ya i kakae garen blong yu be i gat plante bigfala sapraes from we i gat plan blong hem we i waes we i waes. Long evri smolsmol samting long hem i soemaot tingting blong God we hem nomo i save plan blong mekem bebet ya. Insaed long evri pat long smol bodi blong hem, we yu no save luk wetem ae, i gat ol milian smolsmol masin i stap we oli mekem laef blong bebet ya. Be plan blong God blong bebet ya, i no skelem olsem long plan blong God mekem se i sevem yumi. Plan ya, i bigwan moa we i bigwan olgeta.
Long plan blong God ya, yumi mas askem wanem i insaed plan ya se yumi mas mekem? Bigfala plan i gat bigfala ansa long bigfala kwestin.
Pol i Talem se Wanem Yumi Mas Mekem
- 1. Harem gudnuis long Jisas (Rom 10:11-17)
- “17Be ol man oli stap bilif long God, taem oli harem gud nius ya. Mo oli stap harem gud nius ya long ol tok blong Kraes.” (Romans 10:17).
- 2. Bilif long Jisas (Rom 1:16-17, Habakuk 2:4)
- “16Mi mi no sem nating long gud nius ya, from we hem i paoa blong God blong sevem olgeta man we oli bilif long hem, fastaem long mifala ol laen blong Isrel, be biaen long ol narafala man tu. 17Gud nius ya i stap soemaot fasin blong hem blong mekem ol man oli stret man long fes blong hem. Fasin ya i stap kamtru long yumi long bilif nomo, i stat long stat blong hem gogo kasem en blong hem. Mo hemia i olsem tok blong Baebol, we i talem se, 'Man we i stret man long fes blong God from we hem i bilif, hem bambae i kasem laef.'” (Rom 1:16-17).
- 3. Tanem tingting blong yu (Rom 2:4-6, 6:1-2)
- “4!Yufala i no tinghevi long fasin blong God nating! Hem i kaen tumas long yufala, mo i no save kros kwik long yufala, mo tingting blong hem i longfala tumas long yufala, be yufala i stap lukluk ol gudfala fasin ya blong hem olsem nating nomo. ?Yufala i no save we hem i kaen tumas long yufala blong pulum yufala, blong yufala i tanem tingting blong yufala, blong yufala i lego ol fasin nogud blong yufala? 5-6Yufala i stronghed, yufala i no save tanem tingting blong yufala nating. Mo from samting ya, yufala i stap hivimap ol panis blong yufala. God bambae i save givim pei long evri man, stret long mak blong ol fasin we oli bin mekem.” (Rom 2:4-6).
- 4. Telemaot bilif blong Jisas (Rom 10:8-10)
- “8Prapa tok blong hem i talem se, “Tok blong God i stap klosap long yu finis. I stap long maot blong yu mo long tingting blong yu.” Tok ya i stamba blong bilif ya we mifala i stap talemaot. 9Mo Sapos yu talemaot we Jisas i Hae God, i Masta* blong yu, mo yu bilif long hat blong yu we God i mekem hem i laef bakegen, God bambae i sevem yu. 10Taem yumi bilif long hem long hat blong yumi, God i mekem yumi kam stret man long fes blong hem, mo taem yumi talemaot tok ya, God i sevem yumi.” (Rom 10:8-10).
- 5. Baptaes blong tekemaot sin (Rom 6:3-4)
- “3Yufala i save finis we long taem ya we yumi baptaes blong joen long Jisas Kraes, be baptaes ya, i blong yumi joen long ded blong hem. 4Long baptaes blong yumi, i olsem we oli berem yumi finis, wantaem wetem Kraes. Yumi joen long hem finis long ded blong hem, blong bambae yumi gat niufala laef. Papa blong yumi, hem i mekem Kraes i laef bakegen long bigfala paoa blong hem. Mo long sem fasin, yumi ya tu, yumi save gohed blong wokbaot long niufala laef ya.” (Rom 6:3-4).
- 6. Mekem gud fasin blong laef (Rom 12:1-2,11-12)
- “1Ol brata mo sista. From we God i mekem i gud tumas long yumi long plante samting, mi mi talem strong long yufala, se plis yufala i mas givim olgeta laef blong yufala i go nomo long hem olsem wan sakrefaes. Hemia i wan sakrefaes we i laef mo i tabu, mo we God i glad blong tekem. Hemia nao prapa wosip we i stret nomo blong yufala i mekem long hem. 2Yufala i no mas letem fasin blong yufala i kam olsem fasin blong ol man long wol. Yufala i mas letem God i jenisim tingting blong yufala, blong mekem tingting blong yufala i niuwan olgeta. Nao bambae yufala i save jusumaot ol fasin we God i wantem, wanem i gud, mo wanem hem i glad long hem, mo wanem i stret gud blong mekem. ” (Rom 12:1-2).