Trifala Taem i stap
—Laeftaem, Histri, Oltaem
Baebol lesen ya i isi wan, be sam pipol oli no stap lanem hem yet. Nao plante man oli no savegud Baebol. Lesen ya, i blong trifala taem se yumi stap long trifala, mo yumi mas savegud trifala taem ya. Faswan i sotfala nomo. Namba tu i longfala tumas. Namba tri i nogat stat o en blong hem.
1 Laeftaem (Hem i sotfala nomo)
L A E F T A E M
(Jemes 4:13-17)
Bebi long bel . . . . . . Ded long gref
Jemes 4:13-17 Laeftaem blong yu i gat janis se yu save aftarem God mo lukaotem fasin blong hem (Wok 17:27). Yes, yu save luk long histri, mo yu save luk long heven we taem i gat no stat o en long hem. Be naoia, laeftaem blong yu i stap be hem i sotfala nomo. Yu mas aftarem God long laeftaem blong yu, from hemia taem nomo we yu gat janis blong jenisem laef blong yu.
Hamas yia bambae yu kasem long laeftaem blong yu? Hu i save? Nevamaen se plante man oli wokem laef blong olgeta olsem we oli ting se bambae oli kasem plante yia. Be maet tedei i laswan blong laeftaem blong yu. Hu i save? Yu mas mekem tedei we i dei blong God i sevem yu (2Korin 6:2). "God i makemaot rod blong olgeta man finis. Faswan, bambae man i mas ded, mo biaen, bambae God i jajem hem" (Hibrus 9:27-28).
Yu save betde blong yu, be yu no save dei we bambae yu ded. Nomata hamas taem i pas long medel blong dei ya bambae yu ded, mo dei ya bambae Kraes i kam. En blong laef blong yu i olsem en blong janis blong yu se yu mekem yu rere blong Kraes bambae i jajem yu.
Baebol i tokbaot histri blong wol, be tok ya i smol nomo, from laeftaem blong yu i impoten moa. Baebol i soemaot we God i gat wan gudfala plan blong sevem yu, nao yu mas ansarem plan ya long laeftaem blong yu.
Sapos yu usum Baebol blong lukaotem ol taem blong histri mo fujia nomo, be yu mestem wanem i impoten moa se taem naoia. Fastaem yu mas lukaotem wanem Baebol i telemaot longsaed blong laef blong yu.
2 Histtri (Stat blong wol gogo wol i lus)
H I S T R I
(2Pita 3:1-14)
Stat blong wol . . . . . .En blong wol
2Pita 3:1-14 Hamas taem i stap long histri blong wol? Hu i save? Yumi no save wanem yia God i bin wokem wol ya. Tu, yumi no save wanem yia God i wokem en blong wol. Be taem blong histri i raonabaot wan laetaem taems 100, o maet i moa.
Nating se man i olfala, man ya i gotru smolsmol haf blong olgeta histri blong wol, i no kasem wan pesen. Laeftaem blong yumi taem blong faenem God. Be God i usum ol Baebol stori blong histri blong soemaot stamba tingting blong hem.
Histri long Baebol i stap gud blong tijim yumi fasin blong God, mo leftemap tingting blong yumi (Rom 15:4). Histri long Baebol i impoten from i gat mining se God i gat wan plan, se Kraes i kam, i ded long Kros, i laef bakagen, i go antap long heven, nao i King blong heven mo wol ya (Wok 2:22-23,31-33).
Hemia wan eksampol i stap. Pita i usum stori se bigbigfala ren i bin foldaon long taem blong Noa, nao ren ya i draonem olgeta wol i lus. Pita i luksave tru stori ya se hem i pija blong soemaot we Kraes bambae i sevem ol Kristin man long en blong wol taem we bambae Kraes i kambak bakagen (1Pita 3:18-22).
Long nekis japta (1Pita 4), Pita i luk long fiuja, taem we bambae olgeta samting long wol ya i lus, mo God i jajem olgeta man. Be tok ya, i mekem yumi lukluk long laeftaem blong yumi mekem se God bambae i jajem yumi se laef blong yumi klin gud long ae blong hem (2Pita 3:11)
Peter i ting se i impoten tumas we yu lukluk long laef blong yu. Sapos yu studi histri mo fiuja nomo, yu no lukluk laef blong you, i no gud, from i pulum tingting blong yu se yu no tingbaot laeftaem blong yu
Yu no mas tingting tumas long en blong wol, be tingting moa long en blong laeftaem blong yu. Histri mo fiuja blong wol ya, tufala i wari blong God nomo. Yu no mas letem tufala i pulum tingting blong yu, be yu putum tingting blong yu se i lukluk blong fiksimap wanem i no stret long laef blong yu long taem blong naoia.
Hemia nao, yu mas mekem rere blong dei blong jaj se dei bambae Jisas i kam. Nao yu stap rere. Nomata se Jisas bambae i kam biaen yu ded o bifo yu ded, yu stap rere from yu bin lukluk long laef blong yu se i skelem long sem mak long wanem Baebol i talem.
3 Oltaem (i nogat stat o finis long hem)
O L T A E M
(Sam 90:1-4)
i Nogat stat . . . . . . . i Nogat finis
Sam 90:1-4 Nao yumi luk long narafala passis long Baebol, hemia wan song, Sam 90. Nao song ya i tok long God, mo i tokbaot trifala taem ya.
Laeftaem blong Yu: "Fastaem yu tekem graon, yu mekem mifala long hem, mo oltaem yu stap mekem mifala i gobak long graon bakegen... Yia blong mifala i save kasem seventi nomo... Laef blong mifala i save finis kwiktaem nomo, nao mifala i go lus olgeta [mo spirit blong mifala i flae longwe]" (Sam 90:3,10).
Histri blong Olgeta Wol "Long yu, wan taosen yia i olsem wan dei nomo, i olsem yestedei we i pas finis, i olsem wan aoa nomo long naet... Mifala i olsem gras we i stap gru olbaot. Long moning, hem i karem flaoa, be long sapa, flaoa ya i drae, i foldaon." (Sam 90:4-6).
Oltaem i Nogat Stat o En blong hem: "Bifo, taem we yu no mekem ol hil ya yet, long taem ya we yu no wokem wol ya nating yet, be yu yu stap fastaem finis. Yu yu God we yu stap we yu stap, mo bambae yu save stap oltaem, gogo i no save finis." (Sam 90:1-2).
Ol dei blong laef blong yumi, mo oltaem blong God, tufala taem ya, yumi no save skelem tufala. Laef blong yumi stap sot taem nomo, be God i nogat stat o finis long laef blong hem. Jisas i save letem yumi go insaed long laef blong God we i no save finis. Sapos yumi talem no long Jisas, laef blong yumi lus.
Jisas i talem se, "Ol sipsip blong mi oli save harem voes blong mi. Mi mi savegud olgeta, mo olgeta oli save biaen long mi. Mo mi mi givim laef ya long olgeta we i no save finis... olgeta man we oli bilif long mi bambae oli no save lus, oli gat laef we i no save finis" (Jon 10:27-28, 3:16)
Biaen long Jesus
Stamba long tok ya, "oli save biaen long mi.". Tok ya, i gat faef wod nomo long hem, be i talemaot wanem yumi mas wokem long laef blong yumi —folem Jisas.
Smol namba nomo blong man oli mekem mak long histri blong jenisim wol ya mekem se i gud moa. Smol namba blong man nomo oli save mekem mak long taem blong God long heven. Heven mo hel, tufala i stap olsem wanem God i wantem nomo. Smol namba nomo blong man oli save jenisim ol samting we i stap olbaot raonem ol laef blong olgeta.
Plante samting i hapen we yumi no save jenisem o jusum long olgeta. Namba wan eksampol i stap, se ded blong yumi.
Be yumi evri wan i save mekem wan samting se yumi stap folem mo wosip mo obei long Jisas Kraes Pikinini blong God. Nao yumi stap sef nomata wanem i hapen long laeftaem blong yumi, o wanem i hapen long taem we bambae ded i pusum yumi long taem blong God we i nogat stat o en blong hem. Oltaem yumi stap sef from yumi folem Jesus. Hemia tru save blong tok mo promes long Baebol. Sapos yu no folem Jisas, bae yu save rod.