Nambawan Samting long Laef blong Yu
—Hemia Trutok blong Jesus
Jisas i bin ting hevi longsaed blong fasin we ol man oli fulumap ol ae blong olgeta wetem ol samting blong wol ya. Oli tingting tumas long samting blong bodi, olsem klos mo kakae mo mane. Oli ting se sam samting blong wol i impoten moa i bitim samting blong obei long God we i King blong olgeta. Be evri samting blong king ya, hem i rili nambawan samting blong laef blong yumi. (Matthew 6:25-34).
Nao longsaed blong samting ya, Jisas i talem yumi trifala trutok we i isi blong haremsave.
- "I no gat man we i save wok blong tu masta wantaem. Sapos man i mekem olsem, bambae hem i laekem wan, be i no laekem narawan, i agens long hem. No bambae hem i save ona long wan masta, be i stap lukluk nogud long narawan. Yufala i no save mekem we God i bos blong yufala, be long semtaem nomo, mane tu i bos blong yufala" (Matiu 6:24). Yumi mas lukaotgud long samting ya, mekem se mane, mo ol sampting blong wol ya, i no mas kam bos o masta blong yumi.
- "Mi mi talem long yufala, se i nogud yufala i stap tingting tumas from laef blong yufala... I nogud yufala i stap tingting tumas from ol samting blong tumora. Ol bisnes blong tumora i blong tumora. Trabol blong wan dei, hem i naf finis blong dei ya." (Matiu 6:25,34).
- "Fastaem yufala i mas lukaot gud blong obei long God we i King blong yufala, mo blong folem ol stret fasin blong hem. Nao biaen hem i save givim olgeta samting ya tu long yufala." (Matiu 6:33). Yumi mas lukluk long ol samting blong Jisas from i King blong yumi. Yumi no mas ronem ol samting blong bodi, be samting blong spirit nomo.
Long Ostrelia, toktok ya blong Jisas i hard lelebet blong mekem, from maet yuyu wantem obei long Jisas, be ol narafala man oli blokem yu. Yuyu wantem folem tok ya blong Jisas, be oli wantem se yuyu ronem ol narafala samting we i stap long wol ya nomo.
Tingting blong olgeta i olsem, se yuyu mas pusum ol samting blong Jisas i go long wan smol kona long laef blong yu. I nogud we toktok blong God, mo wok blong God, tufala i stap long smol ples nomo long gudhat blong yu. Sippos yumi tru Kristin, oraet yumi mus traem oltaem blong putum King Jisas long fas ples long laef blong yumi.
1 Stamba Tingting
—Haremsave wanem i impoten tumas, mo wanem i nambatu.
Fastaem yumi mas haremsave we kakae mo klos tufala i no bad samting nogat. Jisas i no talem se yumi no mas kakae, o yumi no mas putum klos long ol bodi blong yumi, o yumi no mas lukaot long eni samting we yumi nidim. Kwestin ya i longsaed blong weswan yumi mas putum long fas ples, mo weswan yumi mas putum long nambatu.
Jisas i bin telem yumi se yumi no mas wari o tingting tumas long ol samting blong wol ya. Yumi mas no letem sam samting blong wol i pulum tingting blong yumi, mekem se yumi lusum tingting long Heven (Matiu 6:31).
Nao kakae, mo klos, mo ol samting we bodi blong yumi nidim, Jisas i luk ol samting ya we hem i samting se yu mas gat. "Be Papa blong yufala long heven, hem i save we yufala i mas gat olgeta samting ya. Fastaem yufala i mas lukaot gud blong obei long God we i King blong yufala, mo blong folem ol stret fasin blong hem. Nao biaen hem i save givim olgeta samting ya tu long yufala." (Matiu 6:32-33). Wanem God i givim we i kamtru long wol ya, i impoten tumas, be wanem God i givim we i kamtru long heven, i impoten moa. Yu savegud?
Baebol i talem se, "Yufala i mas tekem Masta blong yumi Jisas Kraes, we hem i olsem klos blong faet blong yufala, we i save blokem olgeta samting. Nao bambae yufala i no moa tingbaot ol rabis fasin ya we tingting blong yufala i wantem, bambae yufala i no moa folem ol fasin ya." (Rom 13:14). Tok ya, i no min se yumi no mas wok blong mekem mani blong pem klos mo kakae. Baebol i talem se ol Kristin man "oli mas holem stret fasin, mo oli mas wok had long han blong olgeta blong kasem kakae blong olgeta" (2Tesalonaeka 3:10-13).
Be yuyu luksave se wanem bodi blong yu i nidim, hemia i narawan long wanem bodi blong yu i wantem. Sua God bae i givim yu ol gudfala samting we i naf. Long samting ya, yumi mas lanem tingting blong tanku, mo yumi mas stap hapi (Philippians 4:6,11).
So yumi haremsave se kakae mo klos mo wanem samting i stamba blong laef ya, hemia i gudfala samting. Tu, yumi mas wok, mekem se bae yumi gat plante blong lukaotem long famli blong yumi mo puaman. Be yumi no mas letem ol samting ya i kam nambawan samting blong laef, mekem se i holem hat blong yumi.
Fastaem yumi mas ronem ol gudfala samting blong Tabu Spirit. Biaen yumi mas hipup gudfala samting we bodi i nidim.
2 i Gat Wan Eksampol
— Meri, Mata, mo Jisas
Long Baebol igat wan tru stori we i helpem yumi blong haremsave lessen ya. Hemia stori blong wan dei long laef blong Meri, Mata, mo Jisas. Stori ya, i olsem wan smol windo blong laef blong trifala ya. Nao yu luk, mekem se yu save kasem plante samting blong tingbaot (Luk 10:38-42).
Luk 10:38-42
¶“38Taem Jisas wetem ol man blong hem oli stap wokbaot long rod, oli kamtru long wan vilej, nao wan woman, nem blong hem Mata, hem i tekem Jisas i go long haos blong hem. 39Woman ya i gat wan sista blong hem, nem blong hem Meri. Mo Meri i kam sidaon long floa klosap long leg blong Masta blong yumi, i stap lesin long ol tok blong hem.” (Luk 10:38-39).
¶“40Nao Mata i stap harem nogud from we i gat tumas wok blong hem, nao i kam talem long Jisas se, 'Masta. ?Olsem wanem? ?Yu ting se i gud we sista blong mi i livim ol wok ya i stap, blong mi wan nomo mi mekem? Plis yu tok long hem blong i kam givhan long mi.'” (Luk 10:40).
¶“41Be Masta blong yumi talem long hem se, 'Mata. Yu stap harem nogud, mo yu stap trabol long plante samting. 42Be i gat wan samting nomo we i stret blong yufala i mekem. Mo Meri, hem i jusumaot gudfala samting ya finis, mo mi mi no save tekemaot samting ya long hem.'” (Luk 10:41-42).
[Bislama Revised Bible © Bible Society of the South Pacific 2012.]
Wok ya blong Mata hem i gudfala samting, mo hem i impoten tu. Mata i mekem kakae blong Jisas, nao hem i spesel fren we hem i visitim Mata. Be Mata i letem samting ya i pulum tingting blong Mata nao hem i mestem trutok blong Jisas we i impoten moa. Be Meri, hem i haremsave we toktok blong Jisas i hae moa.
From wanem Mata i no bin mekem smol kakae nomo, we i naf. Afta, Mata i save lesen long Jisas, hemia namba wan samting. Plis yu tingbaot samting ya.
3 Fasin blong Folem Jisas i Namba Wan..
Samtaem i had blong folem Jisas mekem se i holem fas ples long laef blong yumi. Be i gat some rod long gudfala fasin we i helpem yumi...
- Tabu Spirit i helpem yumi (Filipi 2:12-16).
- Yumi mas mekem prea (Filipi 4:6-7 James 1:5-8).
- Yumi no mas stap slack long miting blong jos (Hibrus 10:25).
- Ridim Baebol from hem i laet blong rod blong yumi (Sam 119:105).
- Yumi mas stap aftarem rod blong fridom we yumi save ronwe long sin (1Korin 10:13).
Stamba blong Lesen ya
Sapos tingting blong Jisas i stap nambawan insaed long ol hat blong yumi, hemia stamba blong holemtaet ol samting blong Spirit blong God. Sapos ol hat blong yumi hafhaf nomo long Jisas, nao hem i talem long yumi se, "From we yufala i hafhaf nomo, olsem we yufala i no hot gud, yufala i no kol gud, bambae mi sakemaot yufala, olsem we man i traot long kakae we i no stret."(Revelesen 3:16).
Sapos yumi rili lavem Jisas, oraet lav ya i mekem yumi "stanap strong. Yufala i no mas slak. Oltaem yufala i mas wok strong long ol wok ya blong Masta blong yumi, from we yufala i save finis, se taem yufala i wok blong Masta ya blong yumi, be wok ya bambae i mas gat frut blong hem"(1Korin 15:58).
Sapos hat blong yumi putum Kraes i King long fasples long laef blong yumi, oraet yumi save "lego ol samting we oli stap blokem yumi, mo ol sin we oli stap holemtaet yumi, nao yumi mas mekem tingting blong yumi strong, blong yumi resis long rod ya we i stap long fes blong yumi. Mo oltaem yumi mas luk long Jisas we hem nomo i stamba blong bilif blong yumi..." (Hibrus 12:1-2).