Jat Longsaed blong ol Buk long Baebol
—i helpem yu save stori long Baebol
Hemia wan jat we i soemaot ol nem blong ol buk long Baebol. Mo tu, jat ya i telemaot smol samting lomgsaed blong wanwan buk ya.
1 Oltestamen
✭ Jenesis, Eksodas, Levitikas, Namba, Dutronome.
Hemia ol buk we i gat ololfala stori blong wol ya bifo bifo. Nao i gat story longsaed blong God i mekem wol ya finis. Mo i gat stori blong Adam mo Iv, mo stori blong Noa, mo stori blong Ebraham mo Aesak, mo Jekob. Ale stori blong Moses mo ol pikinini blong Jekob (nem blong olgeta “twelef traeb blong Isrel”), Nao oli mekem longfala trep (Eksodas) aot long Ijip, mo oli go long wan graon blong promes. Hemia nao, ol buk ya, i gat plante Loa ya we God i givim long neson blong Isrel i gotru long Moses.
✭ Josua, Jajes, Rut, 1Samuel, 2Samuel, 1King, 2King, 1Kronikel, 2Kronikel, Esra, Nehemaea, Esta.
Hemia ol buk we i gat histri blong neson blong Isrel. Nao i gat stori blong jaj mo king oli rul long Isrel. Nao neson blong Isrel i kam wan bigfala paoa long taem we Deved i king. Be afta kingdom ya i seraot, nao plante rabis king oli lidim ol man blong oli lego tru God.
✭ Job, Sam, Ol Proveb, Prija, Sing Blong Solomon.
Hemia plante sing we oli presem God, mo talemaot long God evri samting we i stap long hat blong olgeta. Olgeta sam mo ol narafala buk blong sing mo waes tok long Baebol, oli wan long ol beswan wok we man i bin raetem.
✭ Aesea, Jeremaea, Ol Krae, Esikel, Daniel, Hosea, Joel, Amos, Obadaea, Jona, Maeka, Neham, Habakuk, Sefanaea, Hagae, Sekaraea, Malakae
Hemia ol buk blong ol profet we oli telemaot ol sampting longsaed blong Kraes we bambae hem i bon i kam long wol ya, blong hem i safa from olgeta sin blong evri pipol, mo afta bae i ded long wan kros blong mekem wan sakrifaes, mekem se bae i save tekemaot ol sin ya. Ale, bambae hem i laef bakegen blong go antap long heven mo kam King, mo God i leftemap nem blong hem i go antap olgeta.
2 Niutestamen
Baebol i gat tu haf blong hem, faswan hem i Oltestamen, mo narafala haf hem i Niutestamen. Naoia yumi no moa nidim blong stap aninit long Loa blong Moses long Oltestamen, from nao yumi obei Loa blong Jisas Kraes. Nem ya, “Niutestamen” i min se “Niu Loa”.
✭ Matiu, Mak, Luk, Jon,
Hemia foafala buk we i talemaot story blong Jisas, i stat long taem we hem i bon, go kasem ded blong hem, mo laef bakegen blong hem, ale hem i gobak antap long heven.
✭ Ol Wok
Hemia wan buk we i telemaot stori blong jos we Jisas i mekem finis. Buk ya i longsaed blong wok blong Pita mo Pol, we tufala i bin prijimaot gud nius blong Jisas, blong mekem ol jos blong Kraes.
✭ Rom, 1Korin, 2Korin, Galesia, Efesas, Filipae, Kolosi, 1Tesalonaeka, 2Tesalonaeka, 1Timoti, 2Timoti, Taetas, Filimon, Hibrus, Jemes, 1Pita, 2Pita, 1Jon, 2Jon, 3Jon, Jud.
Long ol fas yia blong Kristin bilif mo jos we Jisas i mekem finis, i gat ol prija we oli ritim ol leta long ol jos blong Kraes. Pol, Jemes, Pita, Jon, mo Jud, faefala man ya, oli ritim ol leta ya long Niutestamen ya. Nao ol leta ya, oli stap longsaed blong Kristin bilif mo gud fasin we yumi save folem Jisas.
✭ Revelesen.
Hemia wan buk blong vison, we aposol Jon i bin ritim. Jisis i bin givim enjel ol vison. Nao enjel ya, i soem ol vison ya long Jon mekem se Jon i save luk wanem wok we King Jisas Kraes bambae i mekem. Sapos yumi wantem faetem ol rabis fasin, oraet yumi lukluk long ol vison ya, from oli soem yumi paoa blong Kraes long laef blong yumi.