Mekem Stret Wosip long God
—?Prapa wosip i olsem Wanem?
Ol man we oli mekem wosip long God, oli mas mekem long fasin ya we Spirit blong God, mo trutok blong God, tufala i stap givim long olgeta. (Jon 4:24)
Yumi mas traem blong mekem wosip long God we i sem mak blong Niutestamen, from Niutestamen i loa blong God blong tede (Kolosi 2:14, Hibrus 1:1-2). Nao Niutestamen i soemaot fiffala rod blong wosip...
1 Lodsapa
Long fasin blong Niutestamen ol Kristin man "oli stap lesen long ol tok ya we ol aposol oli stap tijim olgeta long hem, mo oli stap joen long kampani blong olgeta. Oli stap joen blong brekem bred, mo long mekem prea, mo oltaem oli strong long mekem fasin ya" (Ol Wok 2:42).
Nao tok ya, "brekem bred" i min se "Lodsapa". Long bigining blong jos blong Kraes ol disaepol oli bin kam long wanples blong serem Lodsapa ya long fas dei blong wik (Ol Wok 20:7,11).
Nao i gud we yumi mekem wosip long sem fasin long evri Sande. Jisas i givim eksampol blong mekem Lodsapa ya (Matiu 26:17-30, Mak 14:12-26, Luk 22:7-22, 1Korin 11:23-26). Nao Sapos yumi folem eksampol ya, wosip blong yumi stret gud.
2 Sing
Ol Kristin man long taem blong ol aposol oli bin singim singsing blong jos (Kolosi 3:16, Efesas 5:19). Be oli no usum eni samting we oli plei miusik long hem, se samting olsem gita o kibod o tamborin. I gud we yumi folem sem fasin ya, we yumi singim singsing nomo, yumi no plei long wosip.
?From wanem? From Pol i talem se, "I gud yufala i stap sing long God" be i no talem se, "I gud yufala i stap plei yukalele o kibod long God." Yumi mas stap insaed long wanem Niutestamen i talem. Sapos yumi gohed blong joenem samting long wosip we i kamaot long tingting blong yumi nomo, wosip blong yumi no stret (2Jon 1:9).
3 Kleksin
Ol Kristin man bifo, oli bin givim mane blong givhan long wok blong Jisas (1Korin 16:1-2). I gud we yumi wokem sem samting evri Sande. Kleksin ya, hem i wan samting we yumi mekem long glad hat blong yumi. Man we i kasem bigwan i save givim bigwan, mo man we i kasem smol i save givim smol. I nogud we sam man i stap fosem yumi blong givim samting ya (2Korin 9:7). Naoia plante jos oli gat ol narafala rod blong pulum mane, be Nuitesteman i soemaot wan rod ya nomo blong kasem mane blong jos blong Kraes.
4 Prea
Yumi mas mekem ol prea long God. Prea ya i mas aksem God blong ol samting we yumi nidim, mo prea ya i mas presem God mo talem God tangku tumas from hem i blesem yumi oltaem (Filipae 4:6).
5 Tijim Baebol
Yumi mas ridim Baebol mo man we i save tijim gudfala lesen long Baebol, hem i mas mekem olsem (2 Tim 4:1-5, 1Pita 4:11). Baebol ya, hem i stamba blong olgeta samting blong jos. I nogud we eni man i stap tijim wanem i kamaot long tingting blong hem nomo (1Jon 1:9).
Yumi mas wosip long bilif we i kam long toktok blong Kraes, mekem se yumi savegud wanem God i wantem (Rom 10:17, Rom 14:23, Hibrus 11:6, Jud 1:3). I gud we yumi stap joen long sem bilif long mekem wosip olsem wanem God i wantem.